Miratur molem Aeneas, magalia quondam,
Miratur portas strepitumque et strata uiarum.
Instant ardentes Tyrii : pars ducere muros
Molirique arcem et manibus subuoluere saxa,
Pars optare locum tecto et concludere sulco ;
Iura magistratusque legunt sanctumque senatum.
Hic portus alii effodiunt ; hic alta theatris
Fundamenta locant alii, immanesque columnas
Rupibus excidunt, scaenis decora alta futuris.
VIRGILE , Enéide IV, 68-89
Vritur infelix Dido totaque uagatur
Vrbe furens, qualis coniecta cerua sagitta,
Quam procul incautam nemora inter Cresia fixit
Pastor agens telis liquitque uolatile ferrum
Nescius ; illa fuga siluas saltusque peragrat
Dictaeos ; haeret lateri letalis harundo.
Nunc media Aenean secum per moenia ducit
Sidoniasque ostentat opes urbemque paratam,
Incipit effari mediaque in uoce resistit ;
Nunc eadem labente die conuiuia quaerit,
Iliacosque iterum demens audire labores
Exposcit pendetque iterum narrantis ab ore.
Post ubi digressi, lumenque obscura uicissim
Luna premit suadentque cadentia sidera somnos,
Sola domo maeret uacua stratisque relictis
Incubat : illum absens absentem auditque uidetque,
Aut gremio Ascanium genitoris imagine capta
Detinet, infandum si fallere possit amorem.
Non coeptae adsurgunt turres, non arma iuuentus
Exercet portusue aut propugnacula bello
Tuta parant ; pendent opera interrupta minaeque
Murorum ingentes aequataque machina caelo.
VIRGILE , Enéide IV, 259-264
Vt primum alatis tetigit magalia plantis,
Aenean fundantem arces ac tecta nouantem
Conspicit. Atque illi stellatus iaspide fulua
Ensis erat Tyrioque ardebat murice laena
Demissa ex umeris, diues quae munera Dido
Fecerat, et tenui telas discreuerat auro.
